Cun baile na escalinata de Santa María Nai. Así anunciaba a artista galega Clara Ferrao esta mañá o Festival de Danza Corpo a Terra, que se celebrará nas rúas de Ourense do 7 ao 9 de xullo. A Asociación Traspediante Cultura foi a encargada de presentar a programación, nun acto que contou tamén coa presenza da delegada territorial da Xunta en Ourense, Marisol Díaz Mouteira, a concelleira de Cultura, Belén Iglesias e o director do IES As Lagoas, Carlos Varela.
As tres directoras do colectivo organizador -Paula Quintas, Marta Alonso e Begoña Cuquejo- aproveitaron a presentación para agradecer a colaboración das administracións e a dos cidadáns, que a través dunha campaña de crowdfunding doaron 6.000 euros. O Concello, pola súa banda, destinou 10.000 euros, segundo se explicou. No entanto, o colectivo cultural pediu axuda para futuras edicións, facendo fincapé na dificultade económica que esixe a programación dun evento coma este.
Pola súa banda, a representante do goberno autonómico definiu o evento coma “unha noraboa para a nosa cidade” e reafirmouse na aposta que a administración autonómica fixo porque “queremos que as nosas rúas e prazas se enchan de arte”. “É unha oferta cultural que trata de acercar a arte aos cidadáns”, salientou, e fixo un chamamento á cidadanía para que se achegue a gozar do espectáculo. Tamén a concelleira de Cultura, Belén Iglesias, invitou aos ourensáns a disfrutar dun festival que, segundo as súas palabras, fará dos principais enclaves históricos da cidade “lugares de culto á danza do corpo”.
Por último, interviu o director do IES As Lagoas, que explicou que o centro educativo aporta a parte formativa. Así, lembrou que este é o único instituto de Ourense que ten a modalidade de artes que vai cara as artes escénicas e confirmou que un total de 40 alumnos está a participar dende o día 29 en clases de danza co colectivo cultural.
Canto á programación, o festival arrincará mañá xoves ás 21h na Praza de Santa Eufemia, cunha actuación da artista Clara Ferrao. Posteriormente, na Escalinata de Santa María actuará Jesús Rubio, dende Madrid. E ás 22h, o escenario trasladarase á Praza de San Martiño cun espectáculo de Los Innato, procedentes de Costa Rica.
Xa na xornada do sábado, o telón erguerase ás 20h na Praza de Santa Eufemia, cunha posta en escea da man do artista galego Juanma Lodo. Una hora máis tarde, no mesmo escenario, celebrarase o Certamen Solodos en Danza, co costarricense Gabriel Rodríguez. Ás 21:30h, os ourensáns poderán gozar de espectáculos similares nas Burgas, co galego Fran Martínez e, ás 22.45h, a Praza da Estrela encherase de arte a pé de rúa co dúo Matías Daporta e Angela Milano, dende Holanda e Galicia. O día pecharase á medianoite, cunha actuación da portuguesa Fabiola Augusta no Claustro de San Francisco. Esta actuación contará con aforo reducido.
O domingo, o festival pechará a edición cun último espectáculo na Alameda, tras o espectáculo do madrileño Lucio Bagilvo na Praza de Santa Eufemia, que será ás 21h. O peche será na Alameda cunha festa na que participará Cía Caí, de Madrid, Los Innato, Lado Aldao e catering sonoro-Dj Juanma Lodo.
Texto e fotos: Sara Fontenla
