O Hotel NH Ourense acollerá o vindeiro venres 12 de decembro ás 10h. a presentación da II Gala Benéfica contra o cancro, que correrá a cargo do presidente da Asociación Cultural Xuvenil As Canellas, David Rodríguez; da Presidenta da Asociación Española Contra o Cancro Ourense, María Isidora Gómez; e do coorganizador e presentador da gala, Rubén Riós.
O cartel desta segunda edición presenta novas caras. O mestres de cerimonia serán a actriz Isabel Risco (recentemente Premio Mestre Mateo á mellor actriz) e o actor ourensán Rubén Riós, organizador do evento a través do programa de responsabilidade social da súa produtora, Claqueta Coqueta. Eles serán os encargados de dar paso a un conxunto de actuacións musicais que amenizarán a velada no Auditorio: Rosa Cedrón, Luis Emilio Batallán, Gustavo Almeida. O toque de baile e danza da gala correrá a cargo dos grupos Meigas Tribal (danzas tribais inspiradas en Oriente Medio) e Feel That Crew (danza moderna influenciada polos estilos rap e hip-hop) pertencentes a Bayamo Estudio de Baile.
As entradas (5€ venda anticipada e 8€ venda en billeteira) xa están a venda en diferentes puntos da cidade de Ourense: Casa Toñita, Matiz Instrumentos Musicais, Panadería Seixalvo Roberto, Café Latorta Ourense, Bayamo Escola de Baile, Prink Ourense, Sequesport, Lobisome, Bar O Gaiteiro, Teresa Fontao, Starbar Ourense, Bar Pintas, Motorcycles Shop Ourense, La Huerta Frutería A Valenza, Despacho de Voluntariado do CHUO (Complexo Hospitalario Universitario de Ourense), Umbela, Tienda Aceites José Galán, Cafetería Isaac, Agencia Luena, Librería Puga, Olea Floristería, Trampitán Ourense, Mercería Musko, Peluquería Gallego Estilistas, Quique Martínez estilista, Marquesitos Zapatos e a Sede da AECC (Asociación Española contra o cancro) en Ourense.
A gala será o venres 19 de decembro, ás 20:30h. no Auditorio Municipal de Ourense e os fondos recadados irán destinados integramente á Asociación Española Contra o Cancro.
