“Que un territorio forme parte oficialmente dun “Itinerario europeo” significa unha promoción turística exponencial e unha lombeirada á calidade do produto que ofrece”. Son palabras do presidente da Deputación de Ourense, Manuel Baltar, ao falar das vantaxes competitivas que supón para a provincia ourensá integrar o “Itinerario Termal Europeo” da Asociación de Cidades Históricas Termais de Europa ( EHTTA), que preside, unha entidade que engloba a 51 territorios termais de 18 nacións, e que ten como obxectivo a promoción termal, cultural e socio-económica dos seus territorios termais, entre os que xunto á provincia de ourense atópanse lugares como Baden- Baden, Acqui Terme, Bath, Daruvar, Lą dek- Zdrój, Budapest, Karlovy Vary, Vichy, Loutraki, Bursa ou San Pedro do Sul.
A esta estratexia podería sumarse a de incluír á Ribeira Sacra e ao patrimonio visigodo da provincia de Ourense nun “Itinerario Cultural Europeo”, unha iniciativa na que o presidente Baltar está a traballar da man de “ Urbs Rexia”, unha asociación de ámbito nacional, sen ánimo de lucro, fundada en 2008, e cuxos fins son investigar, protexer e divulgar o patrimonio, tanto material como inmaterial, do pobo visigodo, hispano-romano e outros pobos coetáneos da antigüidade tardía e o mundo altomedieval.
Neste sentido, Baltar mantivo un encontro por vía telemática coa presidenta de Urbs Rexia, Pilar Tormo, e o tamén historiador Artemio Martínez, para analizar a posta en marcha dun proxecto que permita poñer en valor a riqueza patrimonial da época visigoda e hispano-romana da provincia de Ourense -que ten na igrexa de Santa Comba de Bande como un dos seus máximos expoñentes, de referencia nacional-, uníndoo á riqueza natural e patrimonial da Ribeira Sacra.
Tras a reunión, o presidente destacou que a adhesión da Deputación á asociación “ Urbs Rexia” e ao seu proxecto de Itinerario Cultural Europeo “Orixes de Europa” –aprobada no pleno de marzo pasado- “permitirá promocionar á provincia como destino turístico de calidade, un territorio que, desde hai máis de dous milenios, vén contribuíndo con gran relevancia á construción de Europa”, afirma Manuel Baltar, sinalando que se trata dunha estratexia “orientada a desenvolver un novo roteiro cultural europea e inscribila no Instituto Europeo de Itinerarios Culturais do Consello de Europa, promovendo desta maneira o valor patrimonial e a historia do territorio ourensán”.
Turismo de calidade, fomento de viaxes, visitas guiadas e actividades destinadas a mozas, todas elas enfocadas a difundir o legado histórico da provincia de Ourense, son algunhas das iniciativas que a alianza da Deputación con Urbs Rexia traería consigo. Ademais, formar parte dun “Itinerario turístico-cultural europeo” permite intensificar o labor de conservación do patrimonio, xerando recursos económicos e dinamizando o desenvolvemento local e rural, e tamén abrir novas vías de investigación académica sobre os vestixios históricos e a cultura inmaterial da provincia de Ourense coas súas valiosas e singulares tradicións etnográficas.
