Axentes da Policía Autonómica contabilizaron, na pasada fin de semana, un total de 152 denuncias por incumprimento das medidas sanitarias fronte a pandemia do coronavirus. O corpo realizou un total de 108 dispositivos entre o 13 e o 16 de agosto nos concellos de Ourense, Coruña, Lugo, Pontevedra, Vigo e na área metropolitana de Coruña. En conxunto, identificáronse a 174 persoas.
Os axentes de distintas sedes actuaron en quendas de mañá, tarde e noite e contaron co reforzo de efectivos da Xefatura de Santiago de Compostela. Controlaron que os establecementos abertos ao público, os centros comerciais ou as zonas de ocio respectaban as medidas aprobadas no marco da crise sanitaria tales como o aforo, o acondicionamento dos locais, o uso obrigatorio de mascarilla e a prevención do botellón.
