O presidente da Deputación, Manuel Baltar, reuníase o 1 de xullo no Pazo Provincial con Pablo Rodríguez Guede, deportista ourensán tres veces campión de España Sub-23 de BTT (2012, 2013 e 2014) e actual líder do Campionato de España e da Copa do Mundo Sub 23.
Pablo Rodríguez é un ciclista natural de Maceda que compite na especialidade de Cross Country Olympic (BTT XCO), e nas dúas probas do mundial celebradas este ano acadou o 2º e o 1º posto nas carreiras desputadas en Novemesto (República Checa) e Albstadt (Alemaña). O vindeiro domingo 5 de xullo, competirá en Lenzerheide (Suiza) e completará o calendario coas probas que se celebrarán en Canadá, Estados Unidos e Italia.
“Estamos diante dun ourensán de proxección mundial” afirmou Manuel Baltar, “que ten ante si o reto de poder formar parte do equipo olímpico español en Brasil 2016, algo que a Deputación apoiará colaborando coa campaña deste campión ourensán que levará no seu equipamento o lema “Ourense, a provincia termal” dixo o presidente.
