Na mañá do mércores 12 de marzo, Bautista Álvarez propietario do Complexo Hostaleiro Paladium con sede en Vilamartín de Valdeorras, presentaba os museos que albergan as súas instalacións. Dous interiores: de radios e de artes gráficas, e un exterior con todo tipo de máquinas e pezas antigas.
A visita, convocada polo IEV á que asistiron o seu presidente Aurelio Blanco e outros membros, comezaba polo museo de radios que Bautista comparte con Ignacio Rodríguez técnico que repara, restaura e incluso fabrica as pezas para radios. En total teñen reunido preto de mil aparellos (radios, tocadiscos, gramolas e máquinas de música) de diferentes épocas e marcas. A máis antiga data de 1895.
Nos exteriores do complexo, atopamos infinidade de pezas de gran envergadura. Dende unha central eléctrica ata alambiques, pasando por carros de madeira, muíños e incluso un canón.
O terceiro museo, o de artes gráficas é quizais do que máis orgulloso se sinte Bautista. No centro do local atopamos a Imprenta Llorden co equipo completo, incluíndo centos de letras “custou moito montala e poñela a funcionar” explica Álvarez Rey. Xunto a ela hai tamén diferentes máquinas de escribir, periódicos, revistas, e tamén outros artiluxios antigos de ámbitos moi variados.
Malia levar case trinta anos xuntando pezas “porque sempre me gustou” di Bautista, non foi ata hai un ano e medio máis ou menos cando se decidíu a organizalas no que agora é o Museo Paladium. Tal como el mesmo explicou todo aquel que se achegue ata o complexo e o desexe, pode visitalos sen problema “basta con que avisen un día antes”.
Foto: Carlos G. Hervella
(Máis información na edición en papel do Periódico O Sil).