Publicidade
AutomobilismoDeportesEn portadaGalerías de fotosÚltima hora

Pepe López, campión do 53 Rallye de Ourense

Javier Pardo foi o mellor ourensán da proba quedando en sexta posición

 

Os tramos da tarde do 53 Rallye de Ourense, ubicados en Amoeiro e O Carballiño estiveron marcadas polos cambios nos postos altos da táboa de clasificación, con vitoria para o piloto de Citroën, Pepe López despois de que “Cohete” Suárez dominara practicamente todos os tramos. O mellor ourensán da proba foi Javier Pardo co seu Suzuki Swift R4LLY S, que acabou en sexta posición.

 

Pepe López.

 

O TC5 de Amoeiro, primeiro tramo desta tarde de 25 de xullo, comezaba ás 16:04 con clara superioridade do líder dos tramos anteriores José Antonio “Cohete” Suárez, o cal completou os 15,08 quilómetros en 9:29.1 minutos. Pepe López conservou a segunda posición cun tempo de 9:30.3, aínda que advertía problemas coas rodas. Pola súa banda, Iván Ares seguiu en terceira posición a 12.8 segundos de diferenza, e o ourensán Javier Pardo perdía posicións, quedando de oitavo.

O TC7 foi onde máis cambios se produciron, xa que Pepe López arrebatoulle o primeiro posto a “Cohete” Suárez, tanto no tramo como na clasificación xeral, cunha diferenza de 9.1 segundos. Pardo, pola súa banda, mantívose na sexta posición por detrás de Caamaño e a 38.7 segundos de diferenza co primeiro.

 

“Cohete” Suárez.

 

Finalmente, o TC8 do Carballiño confirmaba a vitoria do campión de España do pasado ano, Pepe López, co seu Citroën C3 R5. Ademais, “Cohete” Suárez, debido a un pinchazo, perdía o segundo posto que quedaba en terras galegas para Iván Ares, e tamén o terceiro, arrebatado por Monarri.

José Antonio “Cohete” Suárez xa non quixo confiarse ao remate dos tramos da mañá, xa que admitía que “estou contento cos dous bucles da mañá, o primeiro bastante ben, pero agora quedan dous tramos a dúas pasadas por diante, moitos quilómetros que facer, e moito que correr”.

 

O ourensán Javier Pardo.

 

Pola súa banda, Iván Ares explicaba que “as sensacións son boas, estamos terceiros, un pouco en terra de ninguén. O ritmo de cabeza non o estamos podendo seguir, non son unhas diferenzas grandes, pero sempre estamos detrás dos dous primeiros. A ver se pola tarde podemos estar un pouco máis preto e sacar conclusións de cara aos seguintes rallyes”.

A clasificación xeral do 53 Rallye de Ourense queda deste xeito:

1 Pepe López: 1:14:15.7
2 Iván Ares: 1:15:15.3
3 Alberto Monarri: 1:16:45.8
4 José Antonio “Cohete” Suárez: 1.16:45.8
5 Iago Caamaño: 1:16:53.1
6 Javier Pardo: 1:17:5.6

Fotos: Carlos G. Hervella.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close