Natureza, deporte, patrimonio e tradición. Preto de 30 persoas participaban o 21 de agosto na V Ruta de Sendeirismo Familiar polos Sequeiros, unhas antigas construcións trivesas usadas para o secado das castañas. Era unha andaina en pleno contacto coa natureza, gozando da maxia de pasear entre soutos, coñecendo os sequeiros e as súas funcións.
Os camiñantes tamén podían desfrutar, dende o mirador de Pena Folenche, da panorámica do Val do Navea, declarado “Primeira Paisaxe Protexida de Galicia”.
Esta visita guiada partía ás 9:10h. dende a praza do Concello de Trives. Cada un ía no seu propio vehículo cara o pobo da Pena Folenche, e era alí onde comenzaba a ruta de sendeirismo ás 9:30h.
Trátase dunha ruta circular de dificultade baixa, “un paseo duns 3 quilómetros para cargar os pulmóns na maxia dos nosos bosques”, din dende o Concello de Trives.
Fotos: Concello da Pobra de Trives.
