EconomíaEconomíaÚltima hora

Ponse en marcha unha campaña para previr os riscos no manexo do tractor

Levarase a cabo principalmente no rural galego e está dirixida non só á poboación traballadora senón tamén ao resto de cidadáns que utilizan o tractor para desenvolver actividades no ámbito familia

 

Presentación da campaña de riscos no tractor, en Santiago.

Concienciar e reducir a sinistralidade no uso do tractor, especialmente no eido rural, sensibilizando á poboación para que incorpore nas súas tarefas cotiás a prevención de riscos para evitar accidentes na súa contorna e na circulación en vías públicas. Este é o obxectivo da campaña que se porá en marcha nos vindeiros días e que xurde froito da colaboración das administracións públicas. Estará presente en 208 concellos galegos. Deste xeito, repartiranse por toda Galicia 18.000 fichas informativas e 5000 carteis con información sobre as causas máis recorrentes dos sinistros e as recomendacións básicas que poden evitar accidentes ou, polo menos, minimizar as súas consecuencias.

Xirará en torno a tres eixos principais: alertar e concienciar dos riscos do manexo do tractor e dos seus apeiros, informando de cales son as causas máis recorrentes dos sinistros; informar de cales son as causas máis habituais; e achegar as recomendacións básicas, que de terse sempre en conta, evitarían os accidentes ou, polo menos, minimizarían as súas consecuencias.

A secretaria xeral de Emprego, Covadonga Toca, e o director xeral de Emerxencias e Interior, Luis Menor, presentaban na mañá do 13 de novembro en Santiago esta iniciativa coa que, polo tanto, se busca reducir a sinistralidade neste eido achegando as recomendacións necesarias para evitar accidentes. Na presentación tamén participaron a directora do Instituto de Seguridade e Saúde de Galicia (ISSGA), Adela Quinzá-Torroja; a xefa provincial de Tráfico na Coruña, Victoria Gómez; e o tenente coronel xefe do sector de Tráfico de Galicia da Garda Civil, Francisco Javier Molano.

O Instituto de Seguridade e Saúde Laboral de Galicia (ISSGA), dependente da Consellería de Economía, Emprego e Industria, distribuirá este material en 138 localidades a través de diversos puntos: concellos, centros de saúde e sociais, farmacias, comercios de maquinaria agrícola, puntos de venda de material e produtos agrícolas, colexios e institutos, cafeterías e bares, clínicas veterinarias e cooperativas agrarias e gandeiras.

Así mesmo, facilitará a información á Consellería do Medio Rural para a súa distribución nas oficinas agrarias comarcais e nas unidades tramitadoras do Rexistro Oficial de Maquinaria Agrícola (ROMA). Mentres que a Dirección Xeral de Emerxencias e Interior da Xunta colaborará no reparto a 70 concellos que teñen agrupacións de voluntarios de protección civil. O ISSGA tamén facilitará 7500 trípticos informativos á Garda Civil de Tráfico para o seu reparto en controis en vía pública en toda a Comunidade. A documentación tamén difundirase a través da páxina web do ISSGA (issga.xunta.gal) e das súas redes sociais (twitter e facebook).

Na documentación recóllese información técnica en catro ámbitos que se consideran os máis relevantes na prevención dos riscos neste eido: a seguridade viaria, a protección de toma de forza e do eixo cardánico, as proteccións do tractor fronte a envorcadura e medidas contra a envorcadura.

A campaña vai dirixida non só á poboación traballadora senón tamén ao resto da cidadanía que utiliza o tractor en actividades no ámbito familiar. Neste senso, Toca explicou que a maior parte dos accidentes en tractor non son laborais: dos 18 sinistros mortais rexistrados ata outubro de 2018 ningún tivo lugar no ámbito do traballo. A gran maioría destes sinistros, en palabras da secretaria xeral, prodúcense entre persoas maiores de 65 anos, sendo as principais causas as envorcaduras, atrapamentos e accidentes de circulación. Así mesmo, a iniciativa vai destinada á poboación máis nova co obxectivo de que incorporen o valor da anticipación ao risco como xeito de evitar os perigos e os accidentes no manexo do tractor.

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close