PP e RUA desvelan o seu acordo de goberno en coalición

Das seis concellerías coas que contará A Rúa, cinco serán para o PP e unha para o RUA que ademais entrará na xunta de goberno

“Estou moi ledo de ter conseguido esta coalición, que vai ser moi boa para A Rúa. Coa maioría que acadamos imos gobernar con máis comodidade e tranquilidade durante estes catro anos”. Con estas palabras iniciaba o alcalde popular da Rúa, Álvaro Fernández, a súa comparecencia ante os medios de comunicación na mañá do 11 de xullo para explicar, xunto ao concelleiro do RUA José Vicente Solarat o pacto de goberno entre ambas formacións políticas. “Conseguimos un bo acordo, nós ofrecemos a nosa colaboración, sobre todo, nos eidos da Cultura, Turismo e Deportes”, engadía Solarat.

 

 

A continuación, ambos procedían a asinar este acordo de goberno en coalición que establece un total de seis concellerías das cales cinco estarán en mans do PP e unha nas do RUA. Así Solarat será edil de Cultura, Turismo e Deportes, mentres que a Concellería de Economía e Facenda será ocupada por Teresa Varela; a área de Urbanismo, Obras e Mantemento será asumida polo alcalde; Raúl Yáñez levará Medio Ambiente, Desenvolvemento Rural e Patrimonio, e, finalmente Joana Gómez ocuparase dúas concellerías: as de Sanidade, Servizos Sociais e Igualdade e a de Persoal, Emprego e Réxime Interior.

Ademais a primeira tenente de alcalde será Teresa Varela e a segunda Joana Gómez. José Vicente Solarat tamén formará parte da Xunta de goberno local.

“A Rúa vive uns momentos delicados e temos unha oportunidade importante para sacala adiante”, comentaba o rexedor rues, en tanto que Solarat pedía tamén a colaboración e a “comprensión dos grupos da oposición” para desenvolver este proxecto de goberno.

Esta tarde terá lugar o pleno de organización do Concello da Rúa no que se someterán á votación as novas concellerías, entre outras cuestións relativas ao novo goberno municipal.

Fotos: Carlos G. Hervella.

 

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies