Exposicións, concursos, conferencias e degustacións son os ingredientes cos que a asociación micolóxica berciana Cantharellus organizou as ‘XX Jornadas Micológicas del Bierzo’ que se están desenvolvendo na Casa da Cultura de Ponferrada dende o martes 10 ata o venres 13 de novembro.
No apartado de concurso, os alumnos e alumnas de 2º de ESO do IES Martaguisela do Barco de Valdeorras veñen de acadar o segundo premio na categoría G (1º ciclo de Educación Secundaria colectivo). Tal como explican dende o centro barquense, o concurso, no que participaron centros de ensino do Bierzo e Valdeorras, consistía na elaboración de traballos artísticos (manualidades) relacionados cos cogomelos que forman parte dunha exposición.
Os premios das diferentes categorías serán entregados este venres día 13, en Ponferrada.
