Este venres 25 de xaneiro, presentarase no Casino do Barco de Valdeorras o libro “O Segredo do Castro de Doade”, unha historia que se desenvolve na comarca do Deza (Pontevedra), onde se están levando a cabo tarefas de excavación e presentación das pezas atopadas nun museo creado por iniciativa privada.
O acto comezará ás 20:30h. e contará coa presenza do autor Manuel Blanco Villar, do editor e ilustrador Miguel Ángel Martínez Coello e do impresor Avelino Jácome (autor de “A lenda de Aldara e Galael”.
Editado por A Formiga Rabicha, trátase dun libro para todos os públicos que, por unha banda pon en valor o patrimonio “difundindo a milagre de Codeseda e da Casa do Patrón que pasou de ser a aldea mais afastada e esquencida do Deza a recibir cada ano milleiros de visitantes que poden desfrutar dunha aldea restaurada e conservada dun xeito único e respectuoso co medio e coas máis fondas tradicións”, en palabras de Avelino Jácome; e por outra, difunde os traballos realizados no Castro de Doade que despois de cinco excavacións, pode presumir de ser xa un dos castros mais divulgados de Galicia.
