A nova marca leva por nome Revival e é froito dun proxecto de I+D
A nova marca de godello da adega barquense Godeval, pertencente á Denominación de Orixe Valdeorras, leva por nome Revival e xurde froito dun proxecto de I+D. A investigación desenvolveuse ao longo de tres anos, e, a través dela, esta empresa busca indagar no tempo de maceración a baixas temperaturas (criomaceración) e na extracción da maior cantidade de compoñentes aromáticos na pel da uva. Así se poñía de manifesto no acto de presentación deste novo branco na mañá do 15 de xuño no Espazo Campus Stellae, en Santiago de Compostela. O acto contaba coa presenza de representantes da adega, con sede en Xagoaza, e da conselleira de Medio Rural e Mar, Rosa Quintana, entre outras autoridades.
