O Campus da Auga de Ourense dá un paso máis cara a súa especialización. Así se puxo de manifesto onte, 6 de maio, tras a inauguración dunha mostra na que se expoñen os sete proxectos de deseño para o edificio que representará esta área de especialización do campus universitario da cidade, entre eles o que se alzou como gañador e, por ende, coa concesión para plasmalo na realidade.
No acto estiveron presentes o reitor da Universidade de Vigo, Salustiano Mato. o conselleiro de Cultura, Educación e Ordenación Universitaria, Román Rodríguez, o presidente da Deputación, Manuel Baltar, a delegada territorial da Xunta en Ourense, Marisol Díaz Mouteira, o alcalde do concello, Jesus Vázquez, e o decano do Colexio Oficial de Arquitectos de Galicia, Antonio Maroño.
O proxecto nace co obxectivo que converter o futuro edificio de especialización nun centro de referencia na investigación da auga, para aproveitar a potencia termal de Ourense, pois é a segunda cidade europea máis importante no uso mineromedicinal deste recurso.
