CulturaCulturaMúsicaÚltima hora

Preséntase a 15 edición do Festival Arteficial de Ribadavia

Mesturará o "formato clásico de sempre como romaría de música e cultura alternativas, e un contexto de medidas de prevención e seguridade en tempos Covid", adianta a organización

 

Imaxe de presentación deste festival./ Cedida

 

O Festival Arteficial cumprirá o vindeiro 4 de setembro quince anos. Celebrará esta nova edición na Alameda e no Auditorio do Castelo de Ribadavia. “O formato do festival desta edición, debido ao COVID-19, segue a ser diferente ao que estabamos acostumados, quedando a cabalo entre a edición de 2020 e as edicións pre-coronavirus. Será un acto conformado por catro concertos que se desenvolverán ao longo da tarde. Durante a mañá do sábado terán lugar outras actividades así como a presenza do Mercado das Sementes para os asistentes ao festival. Seguimos achegándonos pouco a pouco ao Festival Arteficial-Romería de Música e Cultura Alternativas de O Ribeiro que coñeciamos antes”.

Así se anunciaba hoxe na presentación deste evento, na Casa do Concello de Ribadavia, coa participación dunha representación da Asociación Arteficial, Manuel Araujo e Claudio Vázquez, ademais de membros do Concello, a tenente de alcalde Paula Rodríguez, e o voceiro Brais Fidalgo; así como membros da Oficina Municipal de Información Xuvenil (OMIX).

Este ano os integrantes do cartel dividiranse nos dous escenario xa citados. Na Alameda de Ribadavia actuarán Laura Lamontagne & Pico Amperio, que mesturan a tradición lírica galego-portuguesa das cantigas de amigo con ritmos electrónicos e ambientes íntimos. O segundo grupo confirmado para esta edición foron Os Amigos dos Músicos, banda ourensá formada por experimentados musicos que mesturan entre eles diferentes tradicións e estilos (os seus integrantes forman parte de bandas como Neno e Pistola, Blood Filloas ou Cinnamon Gum).

O terceiro artista que tocará na Alameda de Ribadavia é Niki Moss, alterego de Miguel Vilhena (vocalista da banda Savanna) multiinstrumentalista que promete unha boa dose de enerxía e psicoledia para esta nova edición.

O encargado para encher o Auditorio do Castelo de Ribadavia será Noiserv, “unha banda dun só home que nos amosará un dos proxectos máis creativos e estimulantes de todo Portugal “Uma palavra começada por N”, capaz de tocar a cada persoa dun xeito íntimo”, din os promotores do Arteficial.

 

 

Para completar a programación desta edición e “para non olvidar os espazos que representan a este festival, como é a Praza da Madalena, no casco histórico da vila, nela terá lugar unha exposición dunha recreación de fotos antigas atopadas nos Arquivos do Museo Etnolóxico de Ribadavia, que se poderán ver penduradas dos balcóns das casas colindantes á praza. E repetindo a experiencia do ano pasado, o Museo Etnolóxico de Ribadavia tamén acollerá no seu interior unha exposición organizada pola Asociación Arteficial”, engaden os organizadores.

O recinto do festival contará cunha barra na que adquirir bebidas, pero non haberá postos de comida. Estableceranse filas únicas de acceso ao servizo, de tal modo que se vaia ocupando o posto ou unidade que quede libre, por orde.

Aforo limitado

Debido ao Covid-19, o aforo redúcese a 175 persoas nos concertos da Alameda, e 300 para o concerto ubicado no Auditorio do Castel de Ribadavia, sempre respetando as medidas de seguridade establecidas para a prevención de contaxio de coronavirus.

“As condicións de acceso e permanencia no recinto estarán suxeitas á normativa vixente en materia sanitaria para previr os contaxios por Covid-19, e poden sufrir modificacións en función da aprobación de novas normas que modifiquen as condicións vixentes no momento de adquisición da entrada. É obrigatorio o uso de máscara, e haberá xel desinfectante no recinto que será proporcionado a todos os asistentes”, indica a organización.

O Festival Arteficial está patrocinado polo Concello de Ribadavia, Músicas ao Vivo, Asociación Galega de Profesionais da Xestión Cultural, Doppler Gestión Cultural, Cruz Vermella e Cervezas Alhambra.

Artigos relacionados

Back to top button