O subdelegado do Goberno en Ourense, Emilio González, pediu esta mañá prudencia aos condutores ante as festas de Nadal e evitar o consumo de alcol e outras drogas ao volante. Así o indicou durante a presentación en Castadón, no P.K. 4 da OU-536, da campaña de seguridade vial provincial “No Nadal, escolle!”, que invita aos condutores a elixir a maneira de volver á casa sans e salvos.
Emilio González, que estivo acompañado do xefe provincial da Dirección Xeral de Tráfico, David Llorente; do alcalde de Pereiro de Aguiar, Luis Menor; e dos tenentes do Subsector de Tráfico da Garda Civil en Ourense, Javier Barja e Juan Carlos Nogueiras; salientou que “nestas datas de reunións familiares, con amizades e con compañeiros de traballo, o número de desprazamentos curtos e coñecidos aumenta, incrementándose os descoidos á hora de cumprir as normas de tráfico”.
“Acorde ao título da campaña queremos trasladar dun xeito realista aos condutores, coa escenificación dun accidente, a responsabilidade que adquiren á hora de conducir tras inxerir alcol ou outras drogas. Todos podemos elixir o vehículo que queremos que nos leve de volta á casa”, subliñou o subdelegado do Goberno.
Na presentación despregáronse diferentes tipos de vehículos: un taxi; un vehículo sinistrado; vehículo de emerxencias; unha grúa; vehículo de Atestados de Tráfico; unha ambulancia e, por último, un furgón fúnebre. Emilio González apelou á responsabilidade dos condutores e lembrou que “en caso de consumir alcol ou outro tipo de drogas opten por desprazarse en taxi ou en transporte público para evitar accidentes”.
O xefe provincial da DXT, David Llorente, sinalou que a suma das sancións por conducir baixo a influencia do alcohol e das drogas supuxo que no que vai de ano en Ourense se detraeran 8.198 puntos, sendo esta a principal causa de perda de puntos e superando aos detraídos por exceso de velocidade (8.030 puntos). “Debemos prestar atención ao incremento no consumo de ansiolíticos e antidepresivos, psicofármacos que poden dar positivo nos controis de drogas e que, moitos deles, están contraindicados para conducir con seguridade un vehículo a motor”, subliñou David Llorente.
Nove sinistros mortais en estrada no 2021 na provincia
Así mesmo, sinalou que na provincia no ano 2021 se produciron nove sinistros mortais en estrada, aos que hai que sumar tres máis en vías urbanas, e 44 feridos graves. O xefe provincial da DXT insistiu na importancia de “non relaxarse ao volante”, así como adecuar a velocidade ao estado da vía e empregar os elementos de seguridade do vehículo.
Durante a presentación da campaña de seguridade vial provincial efectuouse tamén un control preventivo de alcoholemia e drogas aos condutores dos vehículos que circulaban pola zona, no marco da campaña nacional que se está a desenvolver entre o 6 e o 12 de decembro.
A presentación contou coa colaboración dos representantes do colectivo de vítimas de accidentes, Félix González e Daniel Fernández; da Garda Civil de Tráfico; Protección Civil de Pereiro de Aguiar; Cruz Vermella; taxi de Ourense; Grúas Varela Motor e Funeraria Mosquera.
