A novena campaña arqueolóxica en Armea, na parroquia de Santa Mariña de Augas Santas (Allariz), remata este venres deixando novos achados no coñecemento histórico da antiga “Cibdá de Armea”. Así o subliñaba Adolfo Fernández, do Grupo de Estudos en Arqueoloxía, Antigüidade e Territorio (Geaat) e vicedecano da facultade de Historia da Universidade de Vigo que perante este mes agosto desenvolveu a escavación froito do convenio de colaboración subscrito entre Universidade de Vigo e Concello e no que por primeira vez participa a Xunta a través da dirección xeral de Patrimonio.
A intervención deste ano na denominada Finca da Atalaia, de propiedade municipal, centrouse nos traballos de escavación da domus leste, asomando importantes mostras de estruturas e estancias,nas que se atoparon restos tanto pétreos coma de materiais cerámicos, tellas e vidro ademais de pequenas alfaias na súa maioría elaboradas en bronce.
A cibdá de Armea, que segundo os arqueólogos estivo habitada entre os séculos I y II da nosa era, ten de momento escavadas tres domus e una vía central ,dentro desas domus o visitante pode atopar estancias con lareiras, muíños, e zonas adicadas á produción de utensilios de metal e vidro.
