O xurado do concurso de curtametraxes “Valdeorras: denominación de cine”, foi presentado nesta mañá de 31 de agosto, no Complexo Hosteleiro Paladium, situado en Vilamartín de Valdeorras.
Comezaba ás 11:00 horas, e ao acto acudían os seus membros: o director, guionista e actor, Carlos Iglesias; o actor Octavi Pujades; José Pozo e Eli Terry de Inmminet Producciones e as axencias de representación Acción de Actores e Casting Quatro.
Ademais, acudía o padriño do concurso, Christian Escuredo, a produtora Sintelobos, e de parte da D.O. Valdeorras, o presidente José Luis García Pando, o vicepresidente, Marcos Prada, e a vogal Araceli Fernández.
Dende a organización afirmaban que esta iniciativa ten como obxectivo “a dinamización da comarca de Valdeorras, para levar o cine, ou máis ben as rodaxes cinematográficas, as producións audiovisuais a sitios onde normalmente non chegan”.
Pola súa banda, Araceli Fernández recoñecía que esperaba que “as persoas que chegaron doutros lugares, descubriran e atoparan o diferente e auténtico que ten Valdeorras”.
Así, o certame clausurase mañá, domingo 1 de setembro, nun acto que terá lugar ás 12:00 horas, en Xagoaza e no que se entregarán os premios ás curtas gañadoras.
Texto: Alba Prada
Fotos: Carlos G. Hervella