Entre o venres 6 e o domingo 8 de setembro, as instalacións de Mariñamansa, en Ourense, acollerán o 14º Octopus Hóckey Festival, o open internacional de veteranos, incluído desde o ano 2007 no Circuíto Europeo de Veteranos de hóckey herba da Federación Europea de Hóckey, que reunirá a preto de 150 deportistas de diferentes países de Europa.
Este torneo, destinado a tódolos deportistas federados e afeccionados do hóckey herba europeos na modalidade de maiores de 35 anos masculino e de 30 anos feminino, terá como anfitrión ao Club Deportivo Open. Nesta edición participarán 8 equipos masculinos e 3 femeninos procedentes de España, Portugal, Holanda e Alemaña e a competición desenvolverase en dúas liñas. Na masculina faranse dous grupos de catro equipos e na feminina será un grupo único con tres equipos que competirán entre eles.
Así o explicaban na presentación que tiña lugar na mañá do 4 de setembro no Pazo Provincial, cun acto ao que asistían o vicepresidente da Deputación de Ourense, Rosendo Fernández; o concelleiro de Deportes de Ourense, Mario Guede; e o vicepresidente, secretario e vogais do Club Deportivo Open, Alberto Estévez, Javier Valencia, Francisco Javier Masid e Carlos Domínguez, respectivamente.
