Apenas un par de meses despois de que a súa rodaxe rematase en Verín, vén de lanzarse nas redes sociais o teaser da serie de televisión “Vidago Palace”. Nel poden verse as primeiras imaxes esta miniserie de seis capítulos.
Trátase da primeira coprodución luso-galaica, posible grazas a un convenio entre a produtora galega Porcocabo TV, cuxo director xeral é o valdeorrés Alfonso Blanco, e a Agrupación Europea de Cooperación Territorial (AECT) Chaves-Verín.
Esta serie, rodada tamén en Vidago (Portugal), relata unha historia de amor entre mozos de clases diferentes no verán de 1936, unha época marcada polo estalido da guerra civil española e polas conveniencias familiares e sociais. Esta serie conta cun elenco de actores galegos e portugueses entre os que están Sheyla Fariña e David Seijo.
A súa emisión está prevista neste ano na TVG e na RTP (Radio Televisión Portuguesa), e os seus dereitos de transmisión teñen sido preadquiridos tamén por outras televisións europeas.
O teaser pode verse na ligazón:
https://www.facebook.com/Vidago.Palace.hotel.Spa/