Na xornada deste domingo 21 de marzo arranca a nova tempada de pesca fluvial na meirande parte dos ríos galegos (na galería de imaxes está o Sil ao deu paso polo Barco de Valdeorras e A Rúa) para os preto de 37.000 afeccionados galegos que contan con licenza en vigor.
Unha tempada que empeza con entusiasmo, despois dun ano 2020 onde os pescadores tiñan moi complicado saír, e trala entrada en vigor da nova Lei de pesca continental que ten entre os obxectivos “procurar a remuda xeracional dun sector no que a idade media se sitúa entre os 50 e os 70 anos” coa creación das escolas de río para garantir a a formación e sensibilización. Outra das novidades é que os menores de 14 anos non necesiten licenza para poder practicar a pesca, sempre que os acompañe un adulto que si a teña.
Dende a Consellería de Medio Ambiente, Territorio e Vivenda aseguran que a raíz da entrada en vigor da nova lei, “todos os menores de idade, así como os maiores de 65 anos, quedan exentos do pago das taxas correspondentes á obtención da licenza, unha medida que se estima, beneficiará a uns 11.000 pescadores galegos”. Ademais, para axilizar a tramitación e en aras da simplificación administrativa, as licenzas destes dous colectivos (C e C1) manterán ampliada automaticamente a súa vixencia polo prazo dun ano.
Con carácter xeral, a campaña rematará o próximo 31 de xullo, estendéndose ata o 30 de setembro na modalidade de pesca sen morte nos coutos con convenio de colaboración. No que respecta á troita, nalgunhas cabeceiras de montaña e en augas salmoeiras -pesca de salmón e reo- a apertura será o 1 de maio.
Nova orde de axudas para as entidades colaboradoras
Mañá sairá publicada no DOG unha nova orde de axudas dirixida ás entidades colaboradores de pesca fluvial de Galicia para actividades e investimentos de fomento da riqueza piscícola. Entre as actuacións que se poderán subvencionar grazas a este programa, dotado cun orzamento de 80.000 euros, cómpre mencionar a vixilancia dos tramos de pesca fluvial así como a realización de actividades divulgativas ou formativas, tanto presenciais como telemáticas. As entidades interesadas, segundo explicou a conselleira, terán de prazo un mes para poder presentar as súas solicitudes.
A oferta pesqueira para este ano en Galicia inclúe arredor de 30.000 quilómetros de ríos e unha ampla rede de encoros. Deses 30.000 quilómetros, 27.000 correspóndense con zonas libres (un 89,7% do total) e 1.183 km con vedados. Ademais, os tramos libres de pesca sen morte pasan dos 99 da campaña pasada aos 102 da actual, o que supón 46 quilómetros máis que en 2020.
Fotos: Mónica G. Bellver
