Con escasa circulación de peóns polas rúas transcorría este primeiro día laborable en Valdeorras con estado de alarma pola crise do coronavirus. Neste luns 16 de marzo podía verse a persoas que se desprazaban aos seus traballos, outros de compras e a algúns paseando as súas mascotas.
No caso do Barco, coa hostalaría e a meirande parte do comercio pechado (agás os establecementos que permite o real decreto), as rúas e prazas estaban case baleiras e a circulación de vehículos era moi escasa na estrada xeral e o Malecón a horas como o mediodía ou a media tarde, nas que normalmente é complicado circular en coche pola vila.
Noutras localidades como A Rúa algúns establecementos pechados teñen colocados mensaxes de ánimo, nalgúns casos realizados polos máis pequenos.
Fotos: A.R./ Mónica G. Bellver.
