Félix Domínguez, alcalde de Manzaneda, vén de expoñerlle ao director xeral de Desenvolvemento Rural, Miguel Ángel Pérez, o proxecto de reestruturación parcelaria en varias das súas aldeas: Placín-San Miguel-Requeixo. “Trátase dunha reestruturación parcelaria de carácter público, por iniciativa do concello e que conta co respaldo das persoas titulares das parcelas e explotacións existentes”, tal e como se informa dende o Concello de Manzaneda
Implicaría a unha zona de 837 ha de superficie con un perímetro de 23´64 km e máis de 11300 parcelas. “A histórica fragmentación da propiedade da terra en moitos casos dificulta o crecemento das explotacións agrarias, a utilización de maquinaria e o óptimo aproveitamento da superficie. Con este proceso de concentración parcelaria preténdese conseguir unha ordenación da superficie agraria que permita un uso adaptado ás necesidades agrícolas desta zona”, sinala o rexedor.
A esta reunión mantida co director xeral de Desenvolvemento Rural, súmase o oficio de solicitude de avaliación previa que o concello iniciou no ano 2017. Con esta iniciativa preténdese a mellora das estruturas agrarias orientada a favorecer o desenvolvemento económico das explotacións atendendo a diferentes criterios.
