Como consecuencia da rotura dun tramo da captación de augas do Barco, que se producía na noite do 5 de xaneiro, téñense producido problemas no suministro nas localidades de Candís e Coedo. No caso do casco urbano barquense a posta en marcha da depuradora de Viloira permitía garantir o suministro.
No referente a Coedo e Candís, o Concello do Barco ten posto en marcha “un operativo para encher con cisternas os depósitos de ambas poboacións que, a partires do mediodía do 6 de xaneiro xa terán garantido o suministro. O enchido con cisternas manterase ata que finalicen os traballos de reparación da avaría, que se executarán o antes posible, unha vez se dispoña dos materiais necesarios para a súa realización”, tal e como se informa dende esta administración local.
Dende o Concello barquense tamén se indica que os técnicos do Consorcio de Augas están traballando dende primeira hora da mañá do mércores con responsables municipais para “avaliar a avaría e proceder á súa reparación o antes posible, así como para garantir o suministro ás dúas poboacións afectadas”. Asemade destácase que se trata dunha “avaría importante, pero conseguíuse atallar os problemas con celeridade, evitando restricións de auga no casco urbano”.
