Un grupo de prescriptores das escolas de hostalería e sumillería de maior importancia en Suíza achegábanse nestes días ás adegas e viños da Denominación de Orixe Ribeiro. Estes profesores son Christian Baur da Schweizer Hotelfachschule Luzern, Antonio Ruotolo e Ruth Knöpfel do César Ritz Colleges Switzerland, Manfred Wagner do Schulhotel der Hotel und Touristikfachschule Chur e Marc Herbin do Glion Institut de Hautes Etudes.
Os actos da viaxe comezaba o domingo 7 de setembro cun seminario-cata da Denominación de Orixe Ribeiro a cargo do director técnico do Consello Regulador, Pablo Vidal. Ao día seguinte comezaban a percorrer as adegas e a visitar aos colleiteiros do Ribeiro, nun programa que incluíu a visita a 9 adegas: Viña Costeira, Terra do Castelo, Coto de Gomariz, Casal de Armán, Bodegas Docampo, Eduardo Peña, Viña Reboreda, Bodega Alanís e Pazo de Vieite.
“Durante estes días o grupo de expertos tivo a posibilidade de catar preto de 50 referencias do Ribeiro, favorecer o contacto directo cos produtores e coñecer as peculiaridades e principais características da nosa rexión vitivinícola”, segundo se informa dende o consello regulador.
Esta acción resposta ao interese da D.O. Ribeiro polo mercado exterior e, neste caso, máis en concreto polo suízo.”Esta aproximación aos líderes de opinión no mercado suízo está a acadar bos resultados, xa que neste novo achegamento os viños do Ribeiro están a ser percibidos como elaboracións de alta calidade e personalidade, coa autenticidade propia dunha rexión vitivinícola que posúe unha das maiores riquezas varietais no mundo do viño, así como unha das máis dilatadas traxectorias históricas na súa elaboración”, aseguran dende a D.O. Ribeiro.
