OurenseÚltima hora

O programa ‘Carbaemprega’ formará a 85 desempregados do Carballiño

Esta iniciativa, levada a cabo pola Consellería de Economía, Emprego e Industria, está dotada cun orzamento de 20.000 euros
Presentación do obradoiro de emprego no Salón de Plenos do Carballiño.

O programa de emprego “Carbaemprega” ofrecerá formación a 85 alumnos da vila durante un ano para incrementar as súas oportunidades laborais. Para iso, a Consellería de Economía Emprego e Industria investirá máis de 20.000 euros nesta actuación coa que prevé que un 40% dos participantes acaden a súa inserción no mercado laboral.

A presentación desta iniciativa tivo lugar hoxe, 20 de febreiro, no Salón de Plenos do Concello do Carballiño por parte do alcalde, Francisco Fumega, e a delegada territorial da Xunta en Ourense, Marisol Díaz.

Os participantes nesta iniciativa de “Carbaemprega” levarán a cabo técnicas para mellorar a busca de emprego e realización de entrevistas de traballo, ao tempo que desenvolverán accións específicas de formación en tres especialidades: industrial con técnicas de soldadura, operacións básicas en restauración e atención sociosanitaria. A través destes itinerarios, ademais de incidir na formación, executaranse accións dirixidas á prospección empresarial e á orientación laboral dos participantes.

Os programas integrados de emprego financiados pola Administración autonómica, que teñen un ano de duración, están enfocados a mellorar a ocupación dos desempregados establecendo como obxectivo a inserción laboral dun mínimo do 30% dos seus participantes, cifran dende a Xunta. Cada plan integrado inclúe accións personalizadas de diversa natureza -como información, orientación, asesoramento e formación- combinadas con prácticas laborais.

Segundo as cifras achegadas por Emprego, este ano puxéronse en marcha na provincia de Ourense 6 plans integrados de emprego nos que inviste case 1,2 millóns de euros para incrementar as oportunidades laborais de máis de 500 persoas sen emprego.

Díaz Mouteira destacou a importancia de adaptar as cualificacións aos perfís profesionais que precisan as empresas galegas para competir, crecer e xerar emprego. Neste senso, puxo en valor a cooperación entre a Xunta e as administracións locais para apoiar ás persoas con máis dificultades para atopar un emprego.

A actuación forma parte da Axenda 20 para o Emprego, a planificación do Goberno galego en materia laboral para impulsar o traballo estable e de calidade e coa que se pretende en 2020 reducir a taxa de paro ata o 10% coa creación de, polo menos, 80.000 novos empregos.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close