A CEO e a Deputación levarán a cabo unha nova iniciativa, dentro do marco do Plan ExportOU de apoio á internacionalización das empresas ourensás. En concreto trátase dun Servizo Integral de Reforzo Exportador, un sistema dirixido a empresas da provincia que aínda non exportan e queren dar os seus primeiros pasos na súa etapa exportadora. Segundo contaron na presentación de hoxe, 10 de novembro, o presidente da Deputación, Manuel Baltar, e o presidente da Confederación Empresarial de Ourense (CEO), José Manuel Pérez Canal, o obxectivo é que os empresarios poidan visualizar toda a realidade do proceso de exportación: vantaxes, dificultades, asesoramento e guía para o desenvolvemento de procesos.
O presidente da Deputación reiterou que o que pretenden é “incrementar a competitividade das empresas da provincia e aumentar o número das que exportan”. Esta iniciativa é froito dun convenio de colaboración entre a institución provincial e a CEO, para o cal o organismo público destina unha axuda de 100.000 euros. “Difundir internacionalmente a ‘marca Ourense’ é una fortaleza e unha oportunidade para as empresas e para toda a provincia, xa que apoiando a internacionalización, promovemos novas oportunidades de negocio e axudamos a empresas e emprendedores a abrir novos mercados”, explicou Manuel Baltar, que asegurou que a Deputación seguirá achegando unha dotación económica para colaborar coa Confederación Empresarial de Ourense.
Pola súa banda, José Manuel Pérez Canal dixo, en relación a este programa, que exportar “fai que as empresas sexan máis eficientes e competitivas” e que internacionalizar “é unha importante vía para expandir proxectos empresariais”.
Na presentación, os técnicos do programa SIRE, Elvira Losada e Fernando Iglesias, remarcaron que o programa ten en conta que “boa parte das empresas ourensás son de reducido tamaño e non dispoñen de tempo suficiente para realizar todas as ocupacións que engloba a exportación, polo cal este sistema baséase no apoio de profesionais e dunha rede de servizos de información sobre comercio exterior que axudará ao empresario no seu camiño exportador”. A segunda fase do proxecto, que se prevé poñer en marcha no primeiro trimestre de 2018, estará centrada nas empresas que xa exportan de maneira consolidada.
No acto de hoxe Baltar e Pérez Canal entregaron tamén os diplomas aos xóvenes profesionais que completaron a formación en comercio exterior do Servizo de Primeira Exportación. Esta formación realizouse durante os meses de setembro e outubro, cun total de 130 horas lectivas. Esta formación permitiulles aos dez xoves que a completaron, realizar diagnoses sobre o potencial de exportación e produtos; procurar información e ferramentas especializadas en comercio exterior; elaborar estudos de mercado relativos a internacionalización; analizar temas de loxística, financiamento e custes, así como de fidelización de clientes.