O leite co selo de garantía Galega 100% era promocionado na mañá do 20 de novemebro, no marco da XL Carreira Pedestre Popular do San Martiño de Ourense. A directora xeral de Gandaría, Agricultura e Industrias Agroalimentarias, Belén do Campo, participou nesta actividade, que permitiu aos atletas e ao público en xeral degustar este leite de calidade diferenciada a través do reparto gratuíto de minibricks, que se entregaron nunha carpa instalada a carón do pavillón dos Remedios. Xunto a do Campo tamén estiveron o alcalde Ourense, Jesús Vázquez e o subdelegado do Goberno en Ourense, Roberto Castro.
A marca Galega 100% e a súa xestión é propiedade do Laboratorio Interprofesional Galego de Análise do Leite (LIGAL), organismo no que están representadas as industrias lácteas e os produtores de leite. Con este selo identifícase o leite e os produtos lácteos de calidade diferenciada elaborados con materia prima galega, feitos e envasados en Galicia. Trátase de que o consumidor saiba que a materia prima que se emprega nestes produtos procede exclusivamente de explotacións leiteiras inscritas no Rexistro de Explotacións de Calidade Diferenciada.