Quince son os concellos da provincia de Ourense que participan nesta edición do programa da Deputación, Cinema de Verán, unha iniciativa que se desenvolverá entre os meses de agosto e setembro para achegar o audiovisual ao rural, coa proxección da longametraxe documental “A última viaxe do afiador”.
Con esta iniciativa “pretendemos, a través do traballo de Aitor Rei e coa colaboración de Florencio de Arboiro -o maior experto mundial no ámbito dos afiadores e das rodas de afiar-, achegar ao rural un dos nosos sinais de identidade social e cultural: o afiador, figura que temos que reivindicar como esencia da nosa alma ourensá”, en palabras do presidente provincial, Manuel Baltar.
No mes de agosto o filme proxectarase nos concellos de Maceda (1 de agosto), Paderne de Allariz (día 3), San Xoán de Río (5), Rairiz de Veiga (9), Nogueira de Ramuín (10), A Teixeira (11), Baños de Molgas (12), Montederramo (13), Chandrexa de Queixa (14), Manzaneda (16), Castro Caldelas (17), Xunqueira de Espadanedo (19), Parada do Sil (27) e A Peroxa (28), rematando o día 11 de setembro no municipio de Pereiro de Aguiar.
Amais da proxección do documental, a actividade inclúe un coloquio co equipo da película e unha mostra de rodas de afiar do museo Florencio de Arboiro, sendo “unha homenaxe a todos eses homes que levaron polo mundo na súa roda o sentir da provincia de Ourense” di Arboiro, quen colaborou na localización para a rodaxe e nos contactos cos afiadores.
Con respecto ao que será o futuro Museo da Roda de Afiar, un proxecto incluído no Plan Ourense 15-19 da Deputación de Ourense e no que o presidente do goberno provincial está a traballar co propio Florencio de Arboiro, dende a Deputación aseguran que terá a súa ubicación na cidade de Ourense, coa finalidade de ofrecer a máxima accesibilidade para estudantes e público en xeral. “O obxectivo é facer un museo interactivo relacionado cos afiadores e todo o que leva consigo esta figura dende o punto de vista etnográfico, cultural e social para a provincia de Ourense”, explicou Manuel Baltar, engadindo que se está a traballar tamén “nunha unidade didáctica para amosar a historia dos afiadores e a súa xerga propia: o Barallete”.
