Foi obxecto dun acto vandálico na madrugada do 6 ao 7 de decembro
“Estou indignado, porque aínda que todos os fines de semanas hai estragos, nunca se chegou ata este nivel, é bochornoso que vándalos e desvergonzados destrocen o material urbano, como xardineiras ou rouben prantas, entren no complexo deportivo de A Granxa para danar as pistas de tenis ou fútbol, ou como este caso que queimen un parque infantil que aínda non se abriu”. Eran as palabras coas que o alcalde de Verín,Juan Manuel Jiménez Morán, amosaba o seu malestar tras coñecerse a queima, froito dun acto vandálico, do novo parque infantil que se está a construír nas inmediacións da Piscina Climatizada de Verín.
Nos labores de extinción do lume, que danaba esta nova instalación na pasada madrugada, interviñan efectivos da Policía Local de Verín e do Consorcio Contra Incendios e Salvamento da Comarca de Verín, “que impediron que se extendera ao pavillón municipal de deportes que se atopa anexo a esta área infantil. Os danos causados obrigarán a ter que substituír o material danado por un novo, sobre todo o chan e valado externo, sen que aínda se abrira ao público esta nova área infantil”, tal e como se vén de informar desde o Concello de Verín.
O rexidor verinense pedía tamén a colaboración cidadá “para que se poda coller dunha vez a estes vándalos, e cando teñan que abonar do seu peto estes desperfectos non os volverán a facer, xa que isto non é por roubar senón por facer dano e perxudicar a todos os veciños e veciñas”.