Un total de 21 probas, distribuídas por zonas veiguesas como o encoro de Prada, tiñan que ser superadas polos quince equipos galegos e asturianos que participaban no “Gran Prix Race Edition 2016” o 25 de xuño. Eran case 150 os deportistas (homes e mulleres) que en equipos mixtos loitaban por facerse cos premios deste concurso.
A competición tiña como punto de saída a praza do Concello da Veiga e as probas estaban instaladas na praia fluvial de “O Coiñedo” e na dos Franceses, onde se atopaba asemade situada a meta. A proba constaba dun circuíto de 6 km no que se intercalaban diferentes obstáculos naturais e artificiais, ademais de probas de equilibrio, coordinación e habilidades de axilidade mental.
Eran numerosos os equipos ourensáns os que se sumaban á competición: da Rúa, Ourense, Verín, O Barco (como era o caso do integrado por atletas do Adas), O Bolo, Viana do Bolo e da Veiga. Tamén había representación da provincia de Pontevedra e de Asturias.
Fotos: Carlos G. Hervella.
