Quiroga comeza a preparar a XXXVII Feira do Viño, prevista para o 20 e 21 de abril

Entre esas propostas do programa deste certame figuran o concurso “Quiroga de Tapas” ou a Carreira Popular

Imaxe da pasada edición da Feira do Viño de Quiroga./ Foto: Carlos G. Hervella.

A casa consistorial de Quiroga vén de acoller a primeira reunión preparatoria do conxunto de actividades da XXXVII Feira do Viño desta vila lucense, que terá lugar os días 20 e 21 de abril. Entre esas propostas figuran o concurso “Quiroga de Tapas” ou a Carreira Popular. Coincidindo con esta celebración Quiroga acollerá, un ano máis, o Certame Celtibérico de Bandas de Gaitas, na que xa será a súa cuarta edición.

“Nesta primeira xuntanza marcouse o prazo que terán para anotarse os colleiteiros que queiran participar e os requisitos esixidos para o seu viño elaborado artesanalmente . Así os viticultores interesados deberán de inscribirse na casa consistorial antes do día 19 de febreiro, fixándose un número máximo de doce colleiteiros para participar nesta XXXVII edición”, tal e como se informa dende o Concello.

En canto aos requisitos mínimos que deberán de cumprir os viños que se sirvan nesta edición están os de ter unha graduación alcohólica mínima de 12 º para o branco e de 11,5 º para o viño tinto. E unha acidez volátil máxima de 0,5 gr. acético/l. para o viño branco e de 0,6 gr. acético/l. para o viño tinto. No referente á cantidade, fíxase un mínimo de 200 botellas de viño branco e 250 botellas de viño tinto para presentar na feira, e outra cantidade igual ou superior na adega, segundo indica o Concello de Quiroga.

O colleiteiro que teña seleccionado o seu viño para participar na feira debe aboar a cantidade de 100 € e entregar mostras do viño inscrito que deberán de superar dúas probas, unha análise organoléptica e unha cata popular polos membros da Confraría do Viño de Quiroga.

Scroll To Top

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies