Dez novos positivos en 24 horas elevan a 44 os casos activos de Covid-19 no municipio de Quiroga na xornada deste venres 22 de xaneiro, segundo os últimos datos do Sergas, mentres se seguen facendo probas PCR a todos os contactos directos.
Tamén se confirma o peche de dúas aulas no colexio de Educación Infantil e Primaria de Quiroga. “Tras a detección de alumnos positivos o equipo Covid do colexio tomou a decisión de pechar as dúas aulas nas que se detectaron os casos de alumnos positivos mentres están á espera da decisión da Consellería de Sanidade”, explican dende o Concello.
Ante esta situación o alcalde, Julio Álvarez, segue apelando á responsabilidade cidadá mentres as autoridades competentes non tomen outro tipo de medidas e recomenda unha vez máis, como medida de prevención e contención, que “non se saia dos domicilios, xa non só a partir das seis da tarde, se non durante toda a fin de semana, saír soamente para cumprir coas obrigacións laborais, para mercar ou por motivos médicos”.
A nivel municipal, o rexedor local decretou o peche de todos os servizos e dependencias municipais, pero garantindo todos os servizos mínimos aos cidadáns, como a auga, a recollida de lixo ou a limpeza das rúas e xardíns. “Todos os servizos están a traballar segundo as necesidades e os protocolos marcados, pero queda suspendida toda a atención ao público nos departamentos municipais que non teña carácter urxente”, puntualiza.