CulturaCulturaÚltima hora

Quiroga volve á época do Imperio Romano

A festa castrexo-romana Qui-Roma vén de presentar o programa súa sexta edición, prevista para o 17 de agosto
Asistentes á presentación da festa na Delegación da Xunta en Lugo.

Da man de dous dos seus personaxes, o rei castrexo “Cachelus” e o “Chiquilicuatro”, vén de presentarse nesta mañá o programa da sexta edición da festa castrexo-romana Qui-Roma, que se celebrará en Quiroga este sábado día 17. Este acto tiña lugar na Delegación Territorial da Xunta en Lugo e nel contábase coa presenza da xefa territorial da Consellería de Cultura e Turismo, María José Gómez, e de representantes da organización, entre eles Andrés Novoa e Manuel García.

Esta celebración, coa que a vila de Quiroga (asentada nun antigo xacemento aurífero) lembra o seu pasado romano, desenvolverase ao longo de toda a xornada do vindeiro sábado con diversas propostas como mercado, campamentos e espectáculos para públicos de todas as idades.

O programa encetearase coa terceira ruta de cabalos e haberá exposición de bois e demostración e exhibición de cetrería, así como música, mostra de tecido artesanal ou xogos infantís, entre outras propostas. A partir das 20 horas dará comezo o desfile “Arde Loucos”, que dará paso á xa tradicional loita de gladiadores que, a diferenza doutras edicións, neste ano será na praza do Auditorio. E rematará a festa cunha gran paella e unha discoteca móbil.

 

Outro dos momentos do acto.

 

Durante a presentación os organizadores resaltaban a implicación do pobo de Quiroga nesta festa de recreación histórica, con numerosos veciños que se caracterizan de castrexos ou romanos e mesmo que participan activamente nas actividades programadas. Incluso os espectáculos de loita de gladiadores “son protagonizados por xente da zona”, aseguraban.

O pasado romano deixou importantes pegadas no municipio, singularmente en forma de explotacións auríferas, entre as que destaca o famoso túnel de Montefurado. Tamén hai abundantes castros e “unha das poucas pontes enteiramente romanas que quedan en Galicia, a ponte Bibei, que une Quiroga e Trives”, sinalaron os organizadores.

Esta festa pretende poñer en valor a historia do municipio e dinamizar o turismo, nun momento fundamental no que Quiroga está a recibir notables impulsos, como o recoñecemento por parte da Unesco das Montañas do Courel como xeoparque mundial -o primeiro de Galicia en recibir este recoñecemento-, a oficialidade do Camiño de Inverno, e a declaración da Ribeira Sacra como Ben de Interese Cultural, paso previo á solicitude da declaración como patrimonio da humanidade.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close