A Real Banda de Gaitas da Deputación de Ourense suma un recoñecemento máis ao seu repertorio e recibe o Premio Nacional “Excelentia a la Cultura” 2016 como proxecto máis destacado no ámbito da música e da cultura en España. O galardón foi recollido onte en Madrid polo presidente da institución provincial, Manuel Baltar, quen salientou que se trata dun “galardón que recoñece os trinta anos de traxectoria da Real Banda de Gaitas, que ten percorrido os cinco continentes e actuado nos principias escenarios do mundo levando o nome de Ourense e de Galicia e a nosa cultura e tradición musical alá por onde vai”.
Ao remate do acto de entrega do premio, estaba previsto que a agrupación folclórica actuase no Auditorio Nacional, onde tivo lugar o acto, ante a presenza da Raíña Dona Sofía como presidenta de honra. A banda tiña previsto interpretar melodías clásicas e tradicionais galegas como a Novena Sinfonía de Beethoven, o Himno do Antergo Reino de Galicia, a Alborada da Veiga e a Muiñeira de Chantada, ademais dun saúdo de percusión.
Baltar expresou a “enorme satisfacción” que supón este recoñecemento para a provincia de Ourense que, segundo as súas palabras, define como “a merecida homenaxe aos mellores embaixadores da cultura musical de Ourense e Galicia: os seus integrantes e o seu director, Xosé Lois Foxo”.
