Na mellora nos servizos de atención ás persoas que teñen recoñecido algún grao de dependencia a través do Servizo de Axuda no Fogar (SAF) centrábase a reunión que mantiña o alcalde do Bolo, Manuel Corzo, co conselleiro de Política Social, José Manuel Rey Varela, na mañá do 7 de decembro en San Caetano (Santiago de Compostela).
Neste municipio valdeorrés este ano ano incrementouse este servizo en 70 horas até chegar a un total de 781 horas. Ademais, O Bolo conta cunha residencia de iniciativa social con 54 prazas, das cales 13 son financiadas con fondos públicos.
Esta entrevista enmárcase na rolda de contactos que Rey Varela está a manter cos rexedores dos concellos de Galicia coa finalidade de coñecer de primeira man as necesidades e a situación dos servizos e atencións sociais en cada un deles; así como de expoñer as liñas estratéxicas que guiarán a actuación da Consellería de Política Social ao longo do vindeiro ano.