O Grupo de Desenvolvemento Rural de Valdeorras (GDR-7) reuníase na tarde do 11 de abril no salón de actos da Casa Grande de Viloira. O obxecto deste encontro era analizar as propostas de empresas para seleccionar entre elas a que se encargará de realizar o proxecto deste grupo de cara ao vindeiro programa Leader ou “Plan de Desenvolvemento Rural de Galicia 2014-2020”.
Esta entidade (que agrupa aos nove concellos da comarca de Valdeorras así como a representantes empresariais) recibía catro propostas de empresas, tal e como informaba a súa presidenta, a alcaldesa de Carballeda, María Carmen González. A empresa que resulte elixida terá catro meses por diante para elaborar o proxecto, que deberá presentarse ante a Consellería do Medio Rural o vindeiro 2 de xuño.
Na reunión participaban os alcaldes do Barco, Larouco, Petín, Vilamartín, Rubiá, A Veiga, así como as alcaldesas de Carballeda e A Rúa e o tenente de alcalde do Bolo. En cambio, os representantes da Asociación Empresarial de Valdeorras (AEVA) e do Clúster da Pizarra de Galicia delegaban na reunión e non acudían.