“Ilusión e compromiso coa historia, o presente e o futuro de San Xoán de Río” este é o lema co que por vez primeira se presenta a unhas eleccións locais a Agrupación de Electores de San Xoán de Río (RIO) neste municipio.
Dende esta candidatura prometen “traballo, honestidade, honradez, humildade e sentido común” e veñen de presentar un “programa electoral por e para o Concello”. Nel poñen “á veciñanza de San Xoán de Río como centro do proxecto político para o Concello”.
E entre os principios básicos da súa candidatura sitúan “a transparencia e máxima difusión da xestión da Corporación municipal”, “a promoción da participación da veciñanza na vida política, social, económica e cultural” e “a defensa da promoción da igualdade social e de xénero”.
Apostan por “garantir e mellorar o acceso da veciñanza aos servizos básicos, prestando especial atención ás persoas maiores ante o reto do avellentamento do Concello,” e polo impulso do “sector agropecuario como motor económico” de Río.
Tamén defenden un “compromiso coa investigación, recuperación, mantemento, posta en valor e promoción turística do patrimonio histórico, artístico, cultural e natural do Concello”, así como a “promoción da colaboración cos concellos veciños e co resto de administracións públicas para conseguir servizos e infraestruturas básicas para Río, ademais de contribuír á promoción e articulación da zona como espazo de especial interese etnográfico, cultural, natural e turístico”.
Candidatura de RIO
