As previsións meteorolóxicas levan xa uns días avisando de que hoxe, domingo 23 de xuño, sería unha xornada complicada con abundante chuvia, pero o que non se sospeitaba era que chegara xa na tarde-noite do sábado, xusto no momento en que Roblido (A Rúa) celebraba a cea popular das Festas do San Xoán.
En torno ás 21h. os asistentes (unhas 120 persoas) comezaban a degustar o menú elaborado para a ocasión por Mantesil. Un prato de entremeses variados que daba paso ao prato estrela: a paella, e xusto nese momento comezaba a chover. Por sorte non durou moito e ninguén se moveu do seu sitio, aguantando estoicamente. Para os postres xa parara, quedando finalmente unha agradable noite amenizada por A Boa Festa.
Coa cea, a localidade ruesa abría as festas patronais na honra a San Xoán que rematan hoxe e que inclúen o concurso de postres que vai xa pola V edición e que se degustaban onte pola noite (os tres premiados foron doces de fresas, de chocolate e de leite merengado), sorteo de agasallos, pasarrúas e misa solemne.
Fotos: O SIL.