Publicidade
ConcellosÚltima hora

Roteiro pola vida e a obra de Carlos Casares da man de Vázquez-Monxardín, no Barco

Cunha conferencia deste catedrático de Lingua e Literatura Galega comezaban o 15 de maio os actos das Letras Galegas nesta vila

 

“Todo o mundo o coñece como narrador, sen embargo Carlos Casares comezou como poeta”, dicía Afonso Vázquez-Monxardín no comezo da conferencia sobre este escritor ourensán que impartía na tarde do 15 de maio na Biblioteca Florencio Delgado Gurriarán do Barco. A partir de aí, este catedrático de Lingua e Literatura Galega, ía desvelando a faciana literaria de Casares, como narrador e autor de literatura infantil, pero tamén como ensaísta, articulista de prensa e mesmo como tradutor. “É un literato moi ambicioso, a súa traxectoria dá moitas voltas: relatos como Vento Ferido, novelas longas experimentais como Cambio en tres, narración sentimental… Ten unha gran diversidade”, destacaba Vázquez-Monxardín.

E ía máis aló, falando da súa vertente como editor, xa que foi director da Editorial Galaxia; como xestor cultural á fronte do Consello da Cultura Galega; ou como profesor, lembrando que Viana do Bolo foi o seu primeiro destino en 1969/70 e como os choques co poder local lle supuxeron a marcha de Galicia para poder seguir dando clases. A raíz diso, de volta dunha viaxe en tren do País Vasco, coñecía a Kristina Berg, coa que casaría tres meses despois.

Outra das perspectivas de Casares que analizaba o conferenciante era a política, partindo da súa etapa como estudante universitario en Santiago ata a súa elección como deputado autonómico no primeiro Parlamento de Galicia en 1981, onde o seu papel foi clave para levar adiante por consenso a Lei de Normalización Lingüística.

E todo isto, sen perder de vista a súa traxectoria vital, moi ligada a sete escenarios galegos entre os que Vázquez-Monxardín destacaba catro ourensáns: Beiro, a vila de Xinzo de Limia, Viana do Bolo e a cidade de Ourense. A partir de aí, o ponente propoñía ao público outro achegamento á figura de Casares a través do roteiro sobre este autor que existe en Ourense, pasando por cada un dos seus puntos que intercalaba con gravacións nas que podía escoitarse a Casares falando sobre a súa infancia, a súa familia ou mesmo persoeiros de gran influencia e relevancia na súa vida e obra como Ramón Piñeiro.

Ese roteiro inclúe dúas placas fóra da cidade, unha no Seminario Menor, onde estudou Casares, e outra na igrexa de Beiro, onde remataba tamén a conferencia. Con ela botaba a andar o programa de actos das Letras Galegas no Barco, que continuará o 17 de maio cun maratón de lectura pola mañá e cun concerto homenaxe a Carlos Casares da man de Xardín Desordenado ás 20h. na praza Maior.

Fotos: Ángeles Rodríguez

Máis información no Especial Letras Galegas de O SIL

 

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close