CulturaCulturaEducaciónGalerías de fotosÚltima hora

Saída didáctica do IES Cosme López da Rúa ao Castro de Valencia do Sil (Vilamartín)

Texto e fotos: Carmen Díaz Rifón

 

O Departamento de Latín organizou unha saída didáctica para o alumnado de Cultura clásica de 3º de ESO, Latín de 4ª de ESO e Latín de 1º de Bacharelato, que tivo lugar o día 28 de outubro de 2019.

En primeiro lugar, dirixímonos a visitar o Castro de Valencia do Sil, máis coñecido na zona como O Castelo. Trátase dun asentamento civil, posiblemente de finais do imperio romano, que foi escavado durante o mes de xullo deste mesmo ano, aínda que xa se coñecía a súa existencia por escavacións anteriores, levadas a cabo por un grupo de arqueólogos afeccionados de Valdeorras, chamados Os Escarvadores, que desenvolveron o seu traballo nos anos 80 do século pasado.

A subida foi un pouco dura, xa que hai zonas nas que o camiño ten unha pendente moi acusada e os accesos ao castro non son moi bos, pero mereceu a pena. Ademais de coñecer o lugar, a visita tiña o interese engadido de que, durante eses días, un grupo de arqueólogos da USC estaba realizando traballos para datar e analizar con máis precisión o achado. Así, puidemos ver como traballaban in situ e contamos coas explicacións non só sobre o asentamento, senón tamén sobre as técnicas e instrumentos de traballo dos arqueólogos sobre o terreo.

Baixar xa foi máis sinxelo, aínda que tiñamos que ter coidado de non esvarar, porque o terreo estaba moi mollado. Xa en Valencia, recolleunos o autobús e dirixímonos ao Barco, ao Teatro Lauro Olmo, para ver a exposición In terra Gigurrorum, na que se expoñen e explican os restos arqueolóxicos atopados no no castro que acababamos de visitar, así como unha sección dedicada ao grupo dos Escarvadores. Na exposición agardábanos o alumnado de Latín do IES Lauro Olmo e xa pasamos o resto da xornada con eles.

Despois de ver a exposición fomos á Finca da Cruz, un área arqueolóxica que se atopa tamén no Barco. Alí, despois de facer un descanso para comer, Luis Enrique Arias, historiador e bo coñecedor da minería romana, explicounos a importancia e os métodos da extracción do ouro en época romana, así como a presenza de restos de minas romanas en toda a nosa comarca, exemplificando cos que se poden ver nesa mesma finca.

Tivemos sorte porque aguantou sen chover todo o día, case ata a hora de volver. Ás cinco da tarde collemos o autobús e regresamos á Rúa, coñecendo un pouco mellor os restos arqueolóxicos da nosa comarca.

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close