“40 años de descentralización en España (1978-2018): balance y perspectivas”. É o título do último libro de Santiago Lago, catedrático de Economía Aplicada da Universidade de Vigo. Nel, realiza unha minuciosa análise do proceso que ten levado, segundo explicou o propio autor da publicación, “a España a dotarse dun complexo sistema de descentralización económica e política, ao tempo que deu paso a un proceso de converxencia co resto da Unión Europea”.
A obra presentábase neste luns no auditorio de Abanca en Santiago nun acto que contaba coa presenza do presidente da Xunta de Galicia, Alberto Núñez Feijóo, e do expresidente Fernando González Laxe, así como coa asistencia de numerosas autoridades políticas, sociais e académicas, como os reitores Manuel Reigosa, da Universidade de Vigo, e Julio Abalde, da Universidade da Coruña; Miguel Santalices, presidente do Parlamento de Galicia; José Miñones, delegado do Goberno en Galicia; Alfonso Rueda, vicepresidente primeiro da Xunta; José González, conselleiro do Medio Rural; Juan Vieites, presidente da CEG, e os secretarios xerais de UGT e CCOO.
A presentación deste documento coincide ademais cos 40 anos do estatuto galego, polo que o catedrático da Universidade de Vigo tamén se referiu a el indicando que “é inevitable que o paso do tempo deixe obsoleto calquera texto legal e que, por tanto, tería sentido que a súa revisión, pasada a situación de urxencia pola que atravesamos, se incluíse na axenda política”. Porén, incidiu en que lle parece “máis urxente” a revisión dos foros multilaterais de cogobernanza indicados e o impulso de acordos no parlamento galego e entre os axentes sociais sobre os grandes retos de país, como o abandono de terras no medio rural, os desafíos demográficos ou a reforma no funcionamento da administración, entre outros.
Este libro, editado por Funcas (Fundación de las Cajas de Ahorro), ten como obxectivo amosar “o ocorrido na fronte da descentralización política e financeira; os logros conseguidos, pero tamén os erros e tarefas inacabadas, para acabar ofrecendo unha listaxe de propostas de reformas no sistema autonómico en pos dun mellor funcionamento, en termos de equidade, eficiencia, transparencia, estabilidade fiscal e rendición de contas”. O traballo realizado, indícase nel, sintetiza e é debedor de múltiples investigacións desenvolvidas ao longo do tempo polo seu autor con numerosos coautores e nútrese da súa participación en redes de investigación e grupos de traballo.
No acto o presidente da Xunta indicaba que a obra de Santiago Lago Peñas ofrece unha ferramenta útil para os que queiran aprender e reflexionar; “e para forxar consensos futuros sobre a descentralización, conxugando os principios inesquecibles de eficiencia, equidade e solidariedade”, abundou, subliñando que a alternativa, pola contra, é que a financiación e a fiscalidade autonómica evolucionen en función de pactos conxunturais carentes de perspectiva.
O presidente da Xunta concluíu a súa intervención agradecendo unha vez máis ao autor o seu traballo como director do Foro Económico de Galicia e coordinador do Comité de expertos para a recuperación económica de Galicia. Ademais de valorar a súa incorporación ao grupo de expertos do Goberno central para abordar a reforma fiscal.