Malia as retricións e mantendo todas as medidas sanitarias vixentes, a parroquia ruesa de Santo Estevo celebraba na tarde deste Venres Santo, día 2 de abril, un dos actos máis destacados do seu programa de Semana Santa: o Desencravo.
Primeiro tiña lugar a celebración da Liturxia da Palabra, de seguido o sacerdote xa retirado Severino Pérez, collía o relevo para proclamar o Sermón das 7 Palabras e por último, os costaleiros procedían ao desencravo e baixada de Cristo da Cruz, que era levado ao encontro da Virxe para, posteriormente, descansar no féretro de cristal.
Nun ano normal, o acto remataría coa Procesión do Santo Enterro polas rúas da vila, pero nesta ocasión e debido á pandemia, a comitiva non saía.
Mañá, Sábado Santo ás 19:30h. rendirase culto á Soidade; e o Domingo de Resurrección á misa solemne de Pascua será ás 12 horas.
Fotos e vídeo: Mónica G. Bellver.