Coa inauguración da videoinstalación “Tiempo vertical” na Sala dos Arcos de Celanova erguía o pano o 21ª Festival de Cine Internacional de Cine (OUFF) o 27 de outubro. No acto participaban o autor da mostra, Lois Patiño, Fran Gayo, director artístico e programador do OUFF; e Belén Iglesias, concelleira de Educación, Cultura e Comercio de Ourense. Traballando con pantallas múltiples, Patiño aborda en “Tiempo vertical” a concepción do espazo e o tempo desde perspectivas diferentes e á vez complementarias, buscando crear unha experiencia sensorial para o visitante. Nesta edición o festival aposta por estenderse fóra da cidade e, ademais de en Celanova tamén desenvolverá actos en Xinzo, Carballiño e no centro penitenciario de Pereiro de Aguiar.
Para a tarde do 28 de outubro está prevista a sesión inaugural do OUFF no Auditorio de Ourense na que se proxectará o filme documental “Santoalla”, de Andrew Becker e Daniel Mehrer, que asistirán ao acto. Será unha gala, presentada polos xornalistas Marta Gómez e Ángel Suazes, na que se darán a coñecer as liñas xerais desta edición con algunha que outra sorpresa.
“Santoalla” conta a historia da desaparición no 2010 de Martin Verfondern, un holandés que chegaba anos atrás a este pobo petinés coa súa muller Margo Pool. O seu anceio era vivir no campo, lonxe das limitacións e complicacións da cidade, pero os seus plans truncábanse.