En portadaGalerías de fotosÚltima hora

O Santuario das Ermitas, referente do turismo cultural en Valdeorras

O presidente da Xunta visitaba o templo situado no concello do Bolo, na mañá do 2 de agosto

“Recuperar, poñer en valor e difundir a riqueza de lugares como este é un dos elementos clave para que Galicia siga avanzando cara a un destino turístico tranquilo e que apaixone, que ten como principais activos o patrimonio natural, histórico e cultural. Unha idea plasmada na Estratexia de Turismo de Galicia 2020, que ten como obxectivo acadar nesta data os seis millóns de visitantes”. Con estas palabra abría Alberto Núñez Feijóo a súa intervención no exterior do Santuario da Nosa Señora das Ermitas, trala visita institucional que o presidente da Xunta facía ao concello de O Bolo na mañá do 2 de agosto.

A visita comezaba en torno ás onde da mañá nunha céntrica rúa de O Bolo, preto do Concello e, de seguido, a comitiva institucional trasladábase ata a localidade das Ermitas, á beira do río Bibei, para facer un percorrido polo maxestuoso santuario barroco.

 

Foto de familia no adro do Santuario das Ermitas.

Acompañado polo alcalde de O Bolo, Manuel Corzo; polo presidente da Deputación de Ourense, Manuel Baltar; pola directora da Axencia de Turismo de Galicia, Nava Castro; e pola delegada da Xunta en Ourense, Marisol Díaz; así como por diferentes personalizades relixiosas, o presidente da Xunta facía un completo percorrido polo exterior e polo interior do templo, guiado por José Vega, concelleiro de Cultura do Bolo e presidente da Cofradía do Santuario das Ermitas, que fixo un repaso polo devir deste templo encravado na rocha, de difícil acceso e fermosa estrutura.

E trala visita, chegaba o turno de intervencións que como bo anfitrión abría o alcalde Manuel Corzo, satisfeito e contento pola presenza do máximo mandatario autonómico a que lle deu as grazas publicamente. “Nestes intres non quero pedir, xa o fixen cando me recibiron nos seus despachos polos muíño fareleiro, o muíño aceiteiro cedido polo bispado, a microcentral con simulacro de produción de luz, o Plan Director que xa está en marcha,… accións que xunto coa posta en valor do Castelo e do Santuario, darían maior prestixio ao concello e á comarca de Valdeorras”. Corzo tamén destacou outras potencialidades do municipio como o Vía Crucis “coas súas 18 estacións, dos mellores de Europa”, ou os seus viños (especialmente o godello), así como o pasado educativo do Seminario co que contou durante anos o Santuario (no que el mesmo estudou), acusando en certa medida ao bispado por telo levado para A Rúa “deixáronnos sen nada”, dixo como quen non quere a cousa.

 

O concelleiro de Cultura do Bolo, José Vega, durante a visita guiada polo interior do templo.

A este respecto, o bispo de Astorga, Juan Antonio Menéndez, presente no acto, respondía que non foi que quitaran o Seminario senón que “marchou a xente”. Xa en referencia ao Santuario, o mandatario eclesiástico asegurou que “lugares coma este teñen que combinar catro cuestións: unha relixiosa que deu orixe a este edificio; outra cultural e artística pola arte que aquí se agocha; unha terceira ecolóxica e paisaxística vinculada aos viñedos en terrazas que aquí se dan; e unha turística, xa que pode ser un motor importante, sempre que non desapareza a vida humana”.

O último en intervir era o responsable do Executivo autonómico que falou precisamente do futuro turístico de Galicia antes de centrarse no motivo da súa visita: o Santuario das Ermitas, que se atopa en proceso de rehabilitación. Nese sentido Feijóo lembrou que despois de ser declarado Ben de Interese Cultural, en 2012 comezouse a desenvolver o Plan Director “un proxecto no que se investiu case 1,4 millóns de euros para devolverlle a súa beleza orixinal reconstruíndose o muro, mellorándose os pavimentos e as instalacións básicas e embelecéndose as fachadas do trazado do Vía Crucis das que se recuperaron as imaxes relixiosas”.

 

O presidente da Xunta, Alberto Núñez Feijóo durante a súa intervención.

Nesta liña, o presidente da Xunta afirmou que esta posta en valor completarase con outras actuacións, entre as que destacou a mellora das condicións de conservación do seu patrimonio documental, a reparación da cuberta da igrexa, a revisión dos sistemas eléctricos e medidas para garantir a estabilidade da estrutura. “Con todas estas actuacións aseguramos que o Santuario da Nosa Señora das Ermidas gañe forza como o principal imán turístico da comarca”, aseverou, subliñando que, ademais destas obras de recuperación e mellora, o Concello do Bolo está na axenda da Xunta coa pavimentación da rúa central do concello e a mellora da praza pública; e “temos que buscar xunto coa Deputación como rehabilitar os tres muíños das Ermidas”, concluíu asegurando de “como bo estudante do Seminario, Corzo sabe latín e unha vez que logrou as melloras para o Santuario e para O Bolo, está centrado na súa rehabiliación”.

A visita á que asistían veciños do pobo e da contorna, remataba cun aperitivo no exterior do antigo Seminario.

Fotos: Carlos G. Hervella, salvo a última da galería.

Máis información e fotos no seguinte enlace: https://www.osil.info/visita-institucional-ao-santuario-da-nosa-senora-das-ermitas-bolo/

Artigos relacionados

Back to top button

Uso de cookies

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies.
Pinche el enlace para mayor información. También puede consultar aquí nuestra política de protección de datos

ACEPTAR
Aviso de cookies
Close