En portadaGalerías de fotosÚltima hora

Sentida homenaxe póstuma a Luís Nogueira na inauguración da 30ª Semana de Cine do Barco

O deportista e sanitario valdeorrés ten xa a súa "Butaca de Honra" no Teatro Lauro Olmo

 

O 1 de abril deste 2021, Luis Nogueira perdía a batalla contra a enfermidade coa que levaba tempo loitando deixando conmocionada a toda a Valdeorras. Deportista de elite, sanitario, amante da natureza, da súa terra (San Vicente de Leira, Vilamartín), da fotografía e do cine deixaba un gran valeiro na súa familia pero tamén en toda a sociedade valdeorresa que o coñecía e apreciaba.

 

 

Case cinco meses despois, era o Cine Club Groucho Marx (do que era socio e sobre todo amigo) o primeiro en rendirlle unha homenaxe póstuma, aínda que de seguro non será a única. Asi, na tarde deste venres 27 de agosto, Luís Nogueira era protagonista da inauguración da 30 edición da Semana do Cine do Barco.

 

O alcalde do Barco Alfredo García e o actor Paco Campos.

 

Nunha sala de cine con aforo reducido polas medidas sanitarias anticovid, e coa voz en off do presidente do Cine Club José María Rodríguez, o acto comezaba coa estrea da nova curtametraxe de Xacio Baño, Augas Avisais, pero nada máis pasar os títulos de crédito, o escenario e a sala enteira foron de Luís. Cos seus amigos e familiares como público de excepción, era Sabela quen rompía o silencio tocando ao piano un dos seus temas favoritos, o último da banda sonora de Forrest Gump. Sito tampouco faltou á cita interpretando o tema As pequenas cousas de Joan Manuel Serrat, outro dos temas favoritos do homenaxeado.

 

Destapando a placa co nome de Luís Nogueira.

 

Non podía ser doutro xeito e no acto tampouco faltou a parte audiovisual cunha fermosa montaxe de imaxes, vídeos e música realizada por Anxo Santomil. Con tantas facetas como tiña Luís, o vídeo comezaba coa súa afección polo cinema, con imaxes de fondo mentres Pilar lia unha carta escrita do puño e letra pola compañeira de Luís, Moncha Iglesias, sobre os seus gustos cinéfilos, destacando o cine de autor e comprometido e actores como Ricardo Darín e Emma Suárez. “A súa relación co cine foi intensa e para sempre”, remataba. Tampouco os amigos faltaban na proxección con citas especialmente adicadas a Luís; nin as innumerables historias e anécdotas que el mesmo contaba cando ía de ruta; nin por suposto a súa faceta como lanzador de xavelina, colleitando innumerables trofeos a nivel nacional e internacional.

 

A comañeira de Luís, Moncha, e José María Rodríguez.

 

Finalmente, ao ritmo de Carros de Fuego, o propio José María facía acto de presenza para proceder, acompañado por Moncha, ao descubrimento da placa na “Butaca de Honra de Luís Nogueira”, cuxo nome e recordo quedará para sempre vinculado á sala. E alí, diante da butaca e sen poder conter as bágoas, a compañeira de Luís agradecía o acto, recoñecendo que fóra “inesperado” e que “se el poidera definilo faríao coas palabras que máis lle gustaban: marabilloso e fantástico”, dixo, convidando á xente a ir ao cine.

A Semana de Cine estenderase ata o 6 de setembro e incluirá cinco filmes infantís e dez para adultos. Máis información no seguinte enlace: https://www.osil.info/a-xxx-semana-de-cine-do-barco-rendira-homenaxe-a-luis-nogueira-socio-e-amigo-do-cine-club-groucho-marx/

 

 

 

Fotos e vídeos: Carlos G. Hervella.

Artigos relacionados

Back to top button