Ata o vindeiro 10 de xaneiro a sala de exposicións de Santa Leonor en Trives acollerá a exposición “Simplemente xente” de Carlos Temes. Trátase dunha colección de retratos formada por 40 fotografías, 39 delas a cor e unha en branco negro. Nela percorre os rostros, miradas e expresións doutras tantas persoas da comarca, tanto nenos de curta idade como maiores.
A mostra inaugurábase na tarde do 22 de decembro cunha notable asistencia de persoas, moitas das cales buscaban a súa imaxe entre as imaxes expostas. Esta é a primeira vez que Carlos Temes, afeccionado dende neno á fotografía, organiza no seu pobo e amosábase moi contento e agradecido pola resposta da xente ante ao seu traballo.
Ademais, a exposición complétase cunhas 60 imaxes de recunchos da zona trivesa. Hai rúas da vila, tamén casas antigas, así como pontes, elementos pétreos e diversas paisaxes naturais, que gustaban tamén moito ao público.
Fotos: Carlos G. Hervella/ Cedidas.
