Tras tres días mantendo as cifras, o Hospital Público de Valdeorras volve a rexistrar novos ingresos de pacientes con COVID-19. Así, segundo a última actualización de datos da Consellería de Sanidade, o centro barquense ten cinco pacientes con esa enfermidade hospitalizados en planta. É un máis que onte.
En cambio, o Hospital de Verín mantense libre de coronavirus, e no Hospital Universitario de Ourense continúan baixando os ingresos: hai 27 pacientes (8 menos que onte) en planta e 3 en UCI (éstes últimos de prognóstico grave).
Dos 277 casos activos hoxe na Área Sanitaria de Ourense, Verín e O Barco de Valdeorras,
242 permanecen a seguemento a domicilio, 32 están ingresados en planta e 3 en UCI, segundo Sanidade.
O total de casos rexistrados na provincia ascende a 1.961, con 1.556 curados e 128 falecementos (residencias e hospitais). Na provincia lévanse realizado 18.332 probas PCR.
