O Concello de Sober aproveita o verán para realizar obras de mellora nunha trintena de estradas de titularidade municipal. As actuacións, que inclúen un bacheo xeral e o desbroce das zonas, contan cun presuposto de máis de 200.000 euros.
O alcalde, Luis Fernández Guitián, explica nesta liña que o plan de rexeneración de camiños do rural “é unha mostra indiscutible da aposta do goberno local polo rural e pola mellora da calidade de vida dos seus veciños”.
Dentro dunha primeira partida de 117.000 euros -97.000 procedentes do Agader e 20.000 das arcas municipais-, están incluídos os accesos a Sistindomato dende a estrada de Monforte, ao Campo de Pinol dende a estrada de Doade e a Igrexa de Neiras dende a estrada de A Gándara, as tres obras con aglomerado en quente.
Tamén con cargo ao Plan Marco faranse os accesos en O Cadabal (Doade), os accesos a Castroseiros e A Devesa (en Neiras), tamén As Forcadas e O Lameiro (en Amandi), a Cima de Vila e O Barrio (en Figueiroá) e a Rivas (en Rosende).
No marco do Plan de Obras e Servizos (POS) que financia a Deputación de Lugo e o Concello de Sober tamén está previsto rexenerar os accesos a O Vidual (en Doade), Pino de Abaixo en Pinol, A Somoza (Santiorxo), A Lama de Liñarán, Mourentán (en Doade) e Paradela (en Santiorxo). Estes traballos correspondentes ao POS están presupostados en 40.000 euros.
A maiores, con cargo ás arcas municipais e cun presuposto de 50.000 euros, tamén se realizarán traballos en As Laxes (Proendos), Sante de Abaixo (Bulso), Casanova (Bolmente), Prados (Figueiroá), Vilastrille de Abaixo (Proendos), O Campo de Bulso, Naz de Abaixo (Rosende), A Barca (Anllo), así como no Camiño Novo da Panadería en Canabal, entre outros.
Fotos cedidas polo Concello de Sober.