“Ningún neno sen bigote”. Este é o título de campaña de “gran recollida de leite” a favor de Bancos de Alimentos na que participará o Concello de Sober en colaboración coa Obra Social La Caixa. Así o acordaban o rexedor soberino, Luis Fernández Guitián, e o director da Oficina de Monforte, Javier Rodríguez Mosquera.
Esta campaña estará activa ata o vindeiro día 22 de maio, data na que se recollerán os cartóns entregados. Para participar nesta iniciativa de axuda á infancia pódese levar un cartón de leite, ou os que se queira, ao punto de recollida situado no Centro Sociocultural de Sober. O alcalde soberino convida a todos os veciños/as a participar nesta campaña “que axudará a que aos nenos e nenas máis desfavorecidos poidan contar con este alimento básico na súa alimentación”.
Os promotores desta iniciativa alertan de que máis de 350.000 nenos e nenas do noso país non teñen acceso a un alimento tan básico como o leite. O que se pretende con esta iniciativa solidaria é, tal como explican, conseguir “que ningún neno quede sen bigote”.
